මෙරට ක්‍රීඩා සහ තරුණ කටයුතු ප්‍රවර්ධනයට වියට්නාම රජයේ සහාය.
වියට්නාම තානාපතිනී ට්‍රින් ති ටම්( Trinh Thi Tam) සහ තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ අතර හමුවක් අද (ජූලි 05) තරුණ කටයුතු සහ ක්‍රීඩා අමාත්‍යංශයේ දී පැවැත්විණි. මෙම අවස්ථාවට වියට්නාම තානාපති කාර්යාලයේ පළමු ලේකම් නුයෙන් වැන් බින් (Nguyen Van Binh) සහ තරුණ කටයුතු සහ ක්‍රීඩා අමාත්‍යංශයේ ලේකම් අරුණ බණ්ඩාර සහභාගී විය.
වත්මන් රජය තරුණයින් මූලික කරගනිමින් ගෙන යන වැඩ පිළිවෙල ප්‍රශංසනීය බවත්, දෙරට අතර තරුණ හුවමාරුව සඳහා මාවත් විවර කරමින් මෙරට තරුණ තරුණියන්ට උසස් අධ්‍යාපනය සඳහා ශිෂ්‍යත්ව ප්‍රදානය කිරීමට වියට්නාම රජය බලාපොරොත්තු වෙන බවත් වියට්නාම තානාපතිනී ට්‍රින් ති ටම්( Trinh Thi Tam) පැවසුවා ය.
මාෂල් ආර්ට් සටන් කලාව (Martial Art), පාපන්දු (Football), බැඩ්මින්ටන් (Badminton) යන ක්‍රීඩා ප්‍රවර්ධනය කරමින් දෙරට අතර ක්‍රීඩා සහයෝගීතාවය වර්ධනය කිරීම උදෙසා සහයෝගය ලබා දෙන බවත් ඇය වැඩිදුරටත් පැවසුවාය.
කලාපීය සහයෝගීතාවයේ උන්නතිය වෙනුවෙන් අග්නිදිග ආසියානු රටවල් සමඟ ශක්තිමත් බැඳීමක් පවත්වා ගැනීමට වත්මන් රජය වශයෙන් නිරන්තරයෙන් කටයුතු කරන බව තරුණ කටයුතු සහ ක්‍රීඩා අමාත්‍යවරයා මෙහිදී පැවසුවේ ය.
ශ්‍රී ලංකාව සහ වියට්නාමය අතර මිත්‍රත්වයට මෙම වසරේදී වසර 55 ක් පිරීම සහ සැප්තැම්බර් 02 දිනට යෙදී ඇති වියට්නාමයෙහි ජාතික දිනය නිමිති කරගනිමින් අගෝස්තු 19 වන දින ශ්‍රී ලංකාවේ දී පැවැත්වීමට නියමිත වැඩසටහන සඳහා තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ අමාත්‍යවරයාට මෙහිදී ආරාධනා කිරීම ද සිදු කෙරිණි.
Reviewed by Admin
on
August 07, 2025
Rating:
No comments: